Олунньу 20 күнүгэр Өнөрдөөҕү «Тускул» сынньалаҥ киинигэр Саха Өрөспүүбүлүкэтин култууратын туйгуна мелодист, баянист Федоров Василий Гаврильевич «Дууһам иэйиитэ — ырыаларым» ырыанньыга сүрэхтэннэ. Бу кинигэҕэ автор айбыт ырыалара, бииргэ алтыспыт доҕотторун ахтыылара уонна араас кэмнээҕи хаартыскалар үйэтитиллэн киирдилэр. Кинигэ сүрэхтэнэр дьоро киэһэтигэр Василий Федоров ырыаларын бу күн бэйэтэ истиҥник-иһирэхтик толордо, ону сэргэ автор айбыт ырыаларын Өнөр нэһилиэгин ылбаҕай ырыаһыттара, ону тэҥэ доҕотторо, Саха Өрөспүүбүлүкэтин туйгуннара Василий Петухов, Константин Иванов, мелодист ырыаһыт Николай Бурцев уонна Саха Өрөспүүбүлүкэтин үтүөлээх артыыһа Анастасия Готовцева толордулар. Бэйэлэрин эҕэрдэлэрин уонна ырыаларын бэлэхтээтилэр Саха Өрөспүүбүлүкэтин ырыа айааччыларын сойууһун бэрэссэдээтэлэ, Саха Өрөспүүбүлүкэтин култууратын туйгуна Николай Андросов, Саха Өрөспүүбүлүкэтин баянистарын, аккордеонистарын уонна гармонистарын регионнааҕы тэрилтэтин салайааччыта, Саха Өрөспүүбүлүкэтин култууратын туйгуна Алексей Потапов. Үөрүүтүн тэҥҥэ үллэстэ кэллилэр Василий Гаврильевич аймахтара, доҕотторо, бииргэ үөрэммит оҕолоро.
Нэһилиэк олоҕо сайдыытыгар кылаатын иһин «Өнөр нэһилиэгэ» тыа сирин түөлбэтин баһылыга Лукачевскай Николай Николаевич «Өнөр нэһилиэгин бочуоттаах олохтооҕо» знагы туттарда.
